Schnitzelbängg 2001

01_2001.jpg
D’EU nimmt neui Länder uf us em Oschte vo dr Karte,
vil mache mien die nit, eifach e biz warte,
e paar warte vergäbens, hänn mir erfahre irgendwie...
...vor em Astoh hätte sie no e Nümmerli miesse zieh.
© Fäldschnäggli `01

02_2001.jpg
„Trauer herrscht!“ – jetzt syn mir dr Ogi los,
är isch nümm in de Medie, me gseht ihn nümme gross,
mir wänn ihn wieder öfters gseh und schigge ihm drum e Bote:
„Liebe Dölf, due doch eifach s’Becker Babs hürote!“
© Fäldschnäggli `01

03_2001.jpg
Vermummt und mit Schlagstock fahrt är richtig Davos,
Kollege hänn ihm gsait, dört syg mächtig öbbis los,
doch plötzlig kunnt e Schugger und stoppt ihn mit Gwalt
- „Ah guten Tag Herr Fischer, wünsche schönen Aufenthalt!“
© Fäldschnäggli `01

04_2001.jpg
E 18% Initiative z’erscht emol,
denn e Halbierigsinitiative – isch das nit wundervoll,
au Lärmschutzwänd hänn mir gmacht, das isch dr Bescht –
für d’Bewilligung vom Mohler für unsers nägschte Fescht.
© Fäldschnäggli `01

05_2001.jpg
„I love you“ „Melissa“, und was es suscht no git,
sin die im PC inne, macht dä meischtens nümm so mit,
Löcher git’s bim Drugge, dr Compi fascht verändet,
was usekunnt wird z‘USA als Wahlzettel verwändet.
© Fäldschnäggli `01

06_2001.jpg
An jedere Station, wo Büssli und Trämmli halte,
dien so neui Robidogkäschte d’Landschaft verunstalte,
au dört isch Kacke dinn, drum erstunt‘s uns ziemlig schwer:
„Jede länggt dört ine – löhnd die Scheisse, bitte sehr!“
© Fäldschnäggli `01

07_2001.jpg
Oje,oje, oje, oje, oje, oje, oje, oje,
oje, oje, oje, oje, oje, oje, oje,
oje, oje, oje, oje, oje, oje, oje, oje,
oje, oje, oje, oje, oje, oje, oje,
oje, oje, oje, oje, oje, oje, ojemine,
jetzt mien mir vo däm Big-Brother-Müll e zweiti Staffle gseh!!!!
© Fäldschnäggli `01

08_2001.jpg
Popstars und Girlscamp, Der Frisör und House of Love
all die Reality-Shows am Färnseh, mir hasse’s, die syn doof!
Mir wüsse nämmlig nit, was an Container interessiert,
bym Schläpfer hänn mir inegluegt: Gar nüt isch passiert!
© Fäldschnäggli `01

09_2001.jpg
Vyl schlimmi Sache syn au das Joor wieder gscheh,
Krieg, Lawine, Ärdbebe, Mord – kasch im Färnseh gseh,
kunnt’s uf d’Hüfigkeit a, wo öbbis in dr Kischte duet koh,
denn isch dr Schlimmscht dr Becker gsi, wo sich het scheide loh.
© Fäldschnäggli `01

10_2001.jpg
Wäg’em Mc Donald’s Nr. 5 muess s’Merkur-Kaffi wiche,
und au s’Kaffi Gleich isch bald scho nümme s’Gliche,
Traditione syn am Bröggle, wie dä biblisch Turm zu Babel
-          wenn das so wytergoht, kauft dr Ospel no dr Schnabel!
© Fäldschnäggli `01

11_2001.jpg
Mir wangge und mir schwangge und mir könne nümme stoh,
doch am‘ne infizierte Rindli, würds nid anderscht goh,
im Gegesatz zu däm, hän mir kei BSE,
aber nach 100'000 Stange würdet Ihr’s au nümme gseh!!.......Muuuuuhhhh....!!
© Fäldschnäggli `01

12_2001.jpg
Alli finde’s doof vo Honolulu bis uf Rom,
die naive, aggressive und beschränggte Pokémon,
am 1. Auguscht uf em Rütli het me ghört,
hänn die als Nazis tarnt mächtig d’Fyyrlichkeite gstört!
© Fäldschnäggli `01

13_2001.jpg
30 Joor Frauestimmrächt, syn das dört no Zyte gsi,
dr Vogel Gryff nur unter Männer, das isch jetzt au verbi,
bi de letschte Wahle hänn mir grad no richtig gschalte,
will in Zuekunft muess me d‘Fraue, wo me gwählt het, ewig bhalte.
© Fäldschnäggli `01

14_2001.jpg
SMS-le, Wappe, Phone, Surfe und e Filmli gseh,
bald scho bruchsch usser e Natel überhaupt nüt me,
s’git jo au scho söttigi, wo fascht glych syn wie e Mami,
unseri fange a lütte, wenn mir flueche – Gopferdammi!
© Fäldschnäggli `01

gottyellow1.gif
E Wegger, dä macht piep, piep, will är e Wegger isch,
e Teekanne macht amme eifach eso Zisch,
wenn du dr Bsitzer vo ere goldige Uhr bisch,
denn nützt’s dr leider nüt, wenn si dir gstohle worde isch,
hesch dehei e Färnseh, wo mächtig riesig isch,
denn nützt’s dr leider nüt, wenn nit deheime bisch,
wenn du e Liebhaber vo Teigware bisch,
denn nützt’s dr leider nüt, wenn im‘ne Restaurant bisch – für Fisch,
wenn du e Skifahrer bisch, wo im 2. Lauf guet isch,
denn nützt’s dr leider nüt, wenn nach em erschte dusse bisch,
stoht vor dir e Mädi, wo blutt und vollgeil isch,
denn nützt’s dr leider nüt, wenn du e warme Brueder bisch,
wenn Ihr jetzt findet, dä Bangg do, dä bringt’s nit,
denn kömmet nägscht Joor wieder, will denn bringe mir d’Pointe mit!
© Fäldschnäggli `01

gottyellow1.gif
Ei Kueh macht Muh, zwei Kieh mache Muh, Muh,
drei Kieh mache Muh, Muh, Muh, au vier Kieh mache Muh,
wenn dir wännd wüsse wie BSE-Kieh töne,
denn lueget mol Big Brother und loset wie die stöhne!
© Fäldschnäggli `01

D’Helge het gmolt dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!