Bängg 2006

Schnitzelbängg 2006

Jä, mir fordere Eych uf, in Erinnerige z'schwelge,
mir mien Eych nämmlig bichte, mir hän das Joor kai Helge,
unsere Moler, dä isch abtaucht, mir dien Tränli vergiesse,
warum het dä Dubel au e Mohammed zeichne miesse…
© Fäldschnäggli `06

Jä, vorhär in ere dunggle Gass, hän mir ebbis erläbt,
syn vo aim Momänt zum andere in Läbensgfohr gschwäbt,
s'het bällt und mit de Zehn gfletscht, het e Kampfhund miesse sy,
doch nai, dr Alpay, dr Prygeltyrgg, macht Ferie am Rhy….
© Fäldschnäggli `06

Jä, mir syn so immun, mir syn so resischtänt,
mir syn eso vital und nit inkontinänt,
mir bruche au kai Aspirin, mien nie e Teeli nippe,
doch letschti hän mir gveeglet und jetzt hän mir d'Veegelgrippe…
© Fäldschnäggli `06

Version Oberwil:
Jä, das komische H5N1-Virus isch bees,
alli Lyt hänn Angscht, di Beamte syn närvees,
d'Hiehner mien im Stall in blibe, oje-mine
drum het me au scho länger d'Jacqueline Hasler nymme gseh…
© Fäldschnäggli `06

Version Basel:
Jä, das komische H5N1-Virus isch bees,
alli Lyt hänn Angscht, di Beamte syn närvees,
d'Hiehner mien im Stall in blibe, oje-mine
drum het me au scho länger d’Zanolari nymme gseh…

Gyggeli, dini Zyt isch jetzt verby, wäge däm muesch du nit truurig sy
oh Gyggeli, es isch verby…

My Poulet is over the ocean,
my Poulet is over the sea,
my Poulet is over the ocean
oh bring back my Poulet to me...

Unsere Gyggel, dä isch tot, unsere Gyggel, dä isch tot,
är ka nümme singe Tamiflu, Tamiflu
är ka nümme singe Tamiflu, Tamiflu
tami, tami, tami, Tami-flu, Tami-flu
tami, tami, tami, Tami-flu, Tami-flu
© Fäldschnäggli `06

Jä, mir, mir syn nit wenig, nai, mir, mir syn vil,
do ka jetzt jede ko und sage, was är will,
aber mir hän Larve a und unsri Muusig isch nit gruusig
genau das unterschaidet uns vonere Guggemuusig…
© Fäldschnäggli `06

Jä, im Auewald wird g'holzt, d' Zollfreistroos wird koh,
dr Vosseler het miesse sy Cämpingplatz verloh,
e Vordail het die Stross, drum herrscht bi uns kai Verdruss,
kuum sin d' Schwobe bi uns dinn, scho sin sie wieder duss…
© Fäldschnäggli `06

Huescht, huescht, huescht…Fynstaub…
© Fäldschnäggli `06

Version Oberwil:
Jä, in Oberwil sölls suuber si, vo z'Obe bis am Morge,
darfsch nyt uf e Bode wärfe, alles muesch entsorge,
und vorhär in dr letschte Baiz, mir kenne's nit verstoh,
haisst's, singe darfsch do scho, nur kai Pointe gheie loh…
© Fäldschnäggli `06

Version Basel:
Jä, z’Basel do sölls suuber si, vo z'Obe bis am Morge,
darfsch nyt uf e Bode wärfe, alles muesch entsorge,
und vorhär in dr letschte Baiz, mir kenne's nit verstoh,
haisst's, singe darfsch do scho, nur kai Pointe gheie loh…
© Fäldschnäggli `06

Jä, sy derfe jetzt hyrote, unsri Homosexuelle,
sy derfe sich jetzt s'Jo-Wort gäh, wenn sy das dien welle,
was sich neggt, das liebt sich und duet sich au amme quäle,
schyns wänn sich jetzt dr Koch und dr Sabo lo vermähle…
© Fäldschnäggli `06

Jä, Oberwil isch jetzt e Stadt, e City, e Metropole,
mit Verbräche wie z’ New York und gschtohle wird wie z’ Pole,
Mir hän bald e Rotliechtmilieu, es git scho s’ erschte Puff,
als Puffmamme isch dört schins dr Mohler Ruedi druff…
© Fäldschnäggli `06

Jä, hallo Dytschland, mir kemme, hallo Schwobe, mir syn do,
hän logger im Verbigoh no schnäll d'Tyrgge abegloh,
jetzt kemme mir zu eych und hole uns dr Pott
will wenn mir dä nit kriege, gibt's oa Woasswürschtlboykott…
© Fäldschnäggli `06

Jä, mir hän dehei e Güggeli, drum isch uns Angscht und bang,
het's ägscht d'Vogelgrippe, isch's verbi bald mit sym Gsang?
mir hän aifach s'Gfühl es syg mit sich nit ganz im Reine
- will immer wenn's e Poulet gseht, fangt's sofort grad a weine…
© Fäldschnäggli `06

Dr Basler Buesse-Blues
Jä, in Basel, in dere scheene Stadt,
isch's im Summer haiss, aber nymm so glatt
gumpsch in e Brunne und gheisch voll uf e Ranze
scho kunnt e Schugger, wo dr Buesseblues duet tanze

Refrain:
Das isch dr Buesseblues, u-u-u
fyr jede Saich kriegsch hytzudags e Buess
das isch eso, will's eso sy muess
Bisch in dr Stadt und hesch 2-3 Bierli gschluggt,
und denn merggsch, wie pletzlig d'Blose druggt,
stohsch in e Egge, will's wirgglig sehr pressiert
und zäck, kriegsch di negschti Buess serviert

Du regsch di uf und findsch, das syg e Bschiss
dasch doch nit effentlig und kai Ergernis
aber die Politesse loht sich nit erwaiche:
"Bym negschte Mol muesch halt in d'Hose saiche!"

Refrain:
Das isch dr Buesseblues, u-u-u
fyr jede Saich kriegsch hytzudags e Buess
das isch eso, will's eso sy muess
Und jetzt gohsch go dr Erger abespiehle
dringgsch e Wysse und zwor ganz e kiehle
uf em Haiwäg schwanggsch und duesch e biz lut singe
scho wieder gsehsch ain e Buessebleggli schwinge

Jetzt hesch kai Gäld me und lidisch grossi Quale
eso kasch s'Drämmli zu dir hai gar nymm zahle
saisch zem Schugger, dass är s'Drämmli zahle muess
"Das isch bättlet!" und grad nomol git's e Buess

Refrain:
Das isch dr Buesseblues, u-u-u
fyr jede Saich kriegsch hytzudags e Buess
das isch eso, will's eso sy muess
Voll fruschtriert zyndsch e Zigarette a
s'isch di letschti, doch das muesch jetzt aifach ha,
s'leere Päggli gheisch denn voller Wuet uf d'Strooss
"Das isch Littering!" und scho goht's wieder los
jä liebi Lyt, mir mien jetzt wieder goh,
mir hänn nämmlig in dr letsche Baiz vernoh,
au Laerm und Unfueg wird neuerdings grad g'ahndet
drum wird nach uns au scho polizeilig gfahndet
Refrain:
Das isch dr Buesseblues, u-u-u
fyr jede Saich kriegsch hytzudags e Buess
mir frooge uns, ob das sy muess!
© Fäldschnäggli `06

Diesjoohr hämmer keini gmoolte Helge gha...