Bängg 2023

Schnitzelbängg 2023

Jä, s‘herrscht Fachkräftemangel, d‘Laag, die isch fatal,
s‘fähle Lehrer, Bolizischte, Ärzt und Pflägpersonal,
s‘fähle Handwärker, Källner, s‘fählt obe und s‘fählt unde -
friehner hesch fir das immerhin no Schwoobe gfunde…
plus 50% Zueschlag:
Mir sage Eych jetzt do, worum die nimm dien ko:
Die kenne gar nimm ko - die sin scho alli do…
© Fäldschnäggli '23

Jä, dr Odermatt isch uf de Ski, aifach scho dr Hit,
nimmt fascht bi jedem Renne - so e Pokäli mit,
doch d'Hoffnig uf Blatz ains, muess är grad begraabe -
will no viil schnäller kemme d CS-Aggzie aabe…
© Fäldschnäggli '23

Jä, d‘Simonetta Sommaruga het nimm welle welle,
dr Ueli Murer duet sich au grad zu ihre gselle
au dr Rodscher Federer het s’ Rampeliecht verloh -
Ängelbärger gsehsch es nit, dr Trend isch do zem Goh!
plus 50% Zueschlag:
Und nimm dr Beat Jans ganz haimlig mit, mir fände‘s guet
und wäre gspannt wie lang‘s goht, bis das aine mergge duet…
© Fäldschnäggli '23

Version Oberwil

Jä, d‘Simonetta Sommaruga het nimm welle welle,
dr Ueli Murer duet sich au grad zu ihre gselle
au dr Rodscher Federer het s’ Rampeliecht verloh -
Hanspi Ryser gsehsch es nit, dr Trend isch do zem Goh!
plus 50% Zueschlag:
Und nimm dr Schmassmaa ganz haimlig mit, mir fände‘s guet
Und wäre gspannt wie lang‘s goht, bis das aine mergge duet…
© Fäldschnäggli '23

Jä, si mische Ängland uf - dr Harry und sälli,
fir s’ Keenigshuus isch si - vo Hut us nit e Hälli,
fir uns Schwizer wär das doch - mir sage‘s Eych jetzt do -
wie wenn d‘Martullo Blocher mit em Embolo wurd go…
© Fäldschnäggli '23

Jä, dr Winnetou rittet duur e Wilde Weschte,
do sait är zem Old Shatterhand: "Los emol, mi Beschte,
s‘bricht mir zwor my Härz, aber s‘kemme harti Zyte -
drmit mir woke sin, muesch ab jetzt- elaige wyterrytte…"
© Fäldschnäggli '23

Numme in Oberwil gsunge:
Jä, mir hän ys gfrogt, wär so e Saich duet plaane,
und stellt dört uf dr Wacht e Bushaltstellschikane aane,
dass dr Bus nit im Stau stoht, sig schyns dr Grund -
jetzt hesch vo dört ins Dorf aabe nur no knapp e Stund...
plus 50% Zueschlag:
Doch bringe duet das nüt, use kunnt’s uf s‘Glyche -
will dr Bus darf dört gly nur no mit 30 schlyche…
© Fäldschnäggli '23

Jä, in London obe, mir hän glaubt, mir spinne,
het’s jetzt im Dreykeenigskueche neyi Keenig dinne,
ehrlig gsait dien mir - di alte scho vermisse -
het jede vo uns doch in e Ohr vom Charlie bisse…
© Fäldschnäggli '23

Jä, e Byllyé fir‘s Schwingfescht koschtet hunderti vo Frangge,
fir das hesch kenne luege, wie die sich ummerangge,
wenn gratis wottsch go luege, wie sich paar dien schloh -
kasch aifach jede Obe ans Rhybord aabe goh…
plus 50% Zueschlag:
Wenn nochhär mitem Velo haifahrsch isch’s no digg,
kriegsch mit bizli Glygg no e Stange voll ins Gnigg…
© Fäldschnäggli '23

Jä, sait e Drämmler zunre Drämmlere, findsch‘s nit au no glatt,
hit Nomidaag isch wieder mol e Demo in dr Stadt,
sait d‘Drämmlere zem Drämmler, gäll mach kai fuule Mogge -
letschti isch mol kaini gsi, do bini grad verschrogge…
plus 50% Zueschlag:
Wäg däm Schogg hani mi Drämmli nimm kenne chauffiere,
ha grad e Demo gmacht zem geg kai Demo demonschtriere…
© Fäldschnäggli '23

Jä, Basel baut in d’ Hechi - no me Diirmli git’s,
dr Rochedurm Nr. Drey und dr zwaiti vo dr BIZ,
niemerts isch me Contra, alli sin jetzt Pro -
bi dene Hitzesümmer bisch um jede Schatte froh…
© Fäldschnäggli '23

Jä, 38 Stund sell bim Kanton me nur no schaffe,
bi dere Zahl duet jede Staatsagstellti grad erbaffe,
wie sell das funggtioniere frogge sälli sich drno -
so vill gschafft het bis jetzt no kain vo dene do…
© Fäldschnäggli '23

Jä, är fyylt sich als Gaschtarbeiter, är fyylt sich au arabisch,
är fyylt sich schwul, behinderet und au no katarisch,
als was kasch Du Di nit fyyle, dail‘s uns bitte mit -
„Ich ha‘s au scho brobiert, aber Zircher das goht nit…"
© Fäldschnäggli '23

Jä, ich bi dr Schambbe, e Basler Bolizischt,
gläbbt sich doch do uf d‘Stroos, so e Klimaaggtivischt,
das find ich nit so schlimm, und s‘Scheene isch jo dra -
ändlig mol e Gängschter, wo auch ich verwitsche ka…
plus 50% Zueschlag:
Und dr Sproochfähler han i - ich sag‘s Eych jetzt do,
Ha‘s au probiert doch - statt d‘Hand my Zunge gnoh…
© Fäldschnäggli '23

E Druurspil in a-Moll
(Melodie vom John Lennon - Working Class Hero)

Jä, mir hän welle, nach Heecherem strääbe -
doch fir das muesch zerscht mol s’Eländ erlääbe…
Iberall hämmer gsuecht und s’Eländ denn gfunde -
s’Eländ spiilt - im Joggeli unde!

Deert renne baar Buebe em Ball hindedry -
anschynend sott das unsre FCB sy…
Kai Bass kunnt a - und dr Goalie duet schiile -
die wurde vill lieber nur Playstation spiile…
Nur driber, nit dry und vilicht no drnääbe -
d‘Energiemangellag kasch so live go erlääbe…
Es isch dr Effäggt, wo’s bi Unfäll so git -
kasch nit aaneluege - au wägluege nit…
Match fir Match dien si Pinggt verschängge -
dä Fruscht kasch nur no in Bier go erträngge…
Am Bierstand wartsch denn e Stund oder meh -
immerhin muesch so lang das Druurspil nit gseh…
S‘Spiilfäld halbiere, wär au nit so schlimm -
di gegnerisch Hälfti, die brucht‘s jo jetzt nimm…
Und d‘Ballebuebe, s’isch ys nimm wohl -
bruchsch hit nur no hinterem aigene Gool…
Statt dr schwarze Null wo dr Dave schryybe het welle -
dien si nur so Nulle ufs Spiilfäld stelle…
Mir sin so fair, dien kai Nämme nenne -
will s‘wurd die Nämme jo eh kaine kenne…
Es het se mol gäh, die magische Nächt -
hit sin die Nächt numme no - magisch schlächt…
Während mir no in Erinnrige schwelge -
schafft’s dr FCB - nit mol me uf e Helge…
Enttischt laufe mir iber d’Wettstaibrugg -
...und wiinsche ys - Sforza und Burgener zrugg…
© Fäldschnäggli '23

D'Helge het gmolt d' Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!