Schnitzelbängg 2012


Jä, s’Schnitzelbangg Comité het jetzt ney bestumme,
darfsch nur no singe falls und wenn, denn nur no numme,
grad uns Wildi drifft das hart, mit dr ganze Graft vom Gsetz -
drum mache mir   -   ägs   -   tra   -   lang   -   sam   -   jetz…
© Fäldschnäggli `12

Jä, zwai Byyle, drei Narbe - Autsch! S‘duet jetzt no weh,
e Arm, zwai Bai sin broche - vier Finger oder meh,
ain isch laider gschtorbe, das macht ys stargg betroffe -
drby sin mir jo vorhär nur durs Glaibasel gloffe…
© Fäldschnäggli `12

Jä, e Sohn het sy Babbe im Verdraue letschdi gfrogt:
„Du, s’git do sone Sach, wo mi schambar blogt,
i ha Di gseh bym Dusche, bisch grangg, wa’sch mit Dir los?
Will in dr Schuel isch dä us Plüsch logger 3 Mol so gross…“
© Fäldschnäggli `12

Jä, am Brinz William sini Schwögere, Pippa isch ihre Namme,
wird sehr gärn gfettelet - au vo vorne amme,
dr Wirbel um e Constantin in Sion, het ys dunggt -
isch’s Glych, will au deert stoht e Arsch im Mittelpunggt…
© Fäldschnäggli `12

Jä, dr Hildebrand Phippe, mir kenne sälle guet,
nimmt, will är d’Bewiis nit het, per sofort grad dr Huet,
wär het was gwysst, wär was nit und wär het glooge?
Mir hän zem sicher goh, dr Alte d’Vollmacht grad entzooge…
© Fäldschnäggli `12

Jä, dr intärni Puffer sait zem Styyrmodul:
„Langwiilig isch mr, by dr ganz Daag zimlig fuul.“
Do maint dr Prozässer: „Unser Läbe isch versaut…!
Die Droddle hän ys brombt in e iPhone ynebaut…“
© Fäldschnäggli `12

Jä, dä Maja-Kaländer, wenn me ihn rächt verstoht,
dä sait, dass no in däm Joor dr Menschhait s’Ändi droht,
uns Mensche macht das Angscht, doch anderi bhalte ihri Rue -
Will d’Zircher und Schwoobe gheere dert jo nit drzue…
© Fäldschnäggli `12

Jä, man nehme s’bolitisch Gschigg vom Hanspi Gass,
und no s’Gequake vom Piero Esteriore, isch das krass,
denn no vom Thorschte Fingg dr Charaggter, dä miisi,
und d’Ystellig vom Blatter Sebb, die korrubbti und so fiisi,
vom Haggi nimmt me s’Hirni, das isch jo eher glai,
dr Strauss-Kahn isch so gail, drum nämme mir vo däm grad zwai,
no dien mir’s mischle und miggse, aber alles isch fyr d’Katz -
will was usekunnt, isch dr Chefredaggter vo dr BaZ…
© Fäldschnäggli `12

Jä, um d’Närve z’kitzle, gehn die ainte go Bungeetschampe,
di andere lehn sich aifach so vo Hooligans verdrampe,
e baar fliege mit em Deff duur brennendi Raiffe -
und mir laufe wägem Kick yber Fuessgängerstraiffe…
© Fäldschnäggli `12

Jä, ame scheene Daag syn mir dur s'Gundeli flaniert,
do het ys us em Nyt ain mit Ziegel schigganiert,
nochdäm mir ihn zem Uffgäh hän kenne yberschnuure -
het är gsait, är haig gmaint, dr Thorschte Fingg lauft undeduure...
© Fäldschnäggli `12

Jä, dä tschetschenisch Oligar(s)ch, dr Tschagajev, dä Duubel,
isch koh und het sich Xamax boschtet, fyr e Hampfle Ruubel,
noch 6 Mönet isch scho Schluss gsi, är het ghofft, s’wurd besser laufe -
mir gänn ihm no e Chance, är muess dr FCZ no kaufe…
© Fäldschnäggli `12

Jä, dr Giachen sait zem Gian: „Du, luag, dia schöni Sunna!“
Do sait dr Gian zem Giachen: „Das isch kogaschön, fascht gspunna!
Was miar sogar no bessar gfallt, als do Sunna z’tanka: -
Ma ghört fascht numma Schwiizardütsch, dank am starka Franka!
© Fäldschnäggli `12

Jä, obe-n-ohni uf em Bundesblatz hän sie demonschtriert,
mir hän ys gfrogt, wenn das so wyter goht, wo das no anefiehrt,
wenn mir do inne ummeluege, wurde mir’s goutiere -
wenn d’Dame do eso e biz geg uns dien broteschtiere…
© Fäldschnäggli `12

Jä, ganz frieh mol am Morge, di meischte hän no pennt,
het z’Oberwil uf eimol e Lüchtregglame brennt,
bim Brinzle vo däm Värsli hän mir dänggt: „Ojemine -
ändlig mol bitz Äggsch’n do und kei Sau het’s gseh…“
© Fäldschnäggli `12

Jä’d’Gmeind het ihri Schuelhüüser an Kanton verkauft,
und jetzt weiss keine so genau, wie das eigentlig lauft,
uf dr Gmeind sin sie verwirrt, dien wie kopfloosi Hiehner -
also wenn me’s ganz genau nimmt, isch alles no wie friehner…
© Fäldschnäggli `12
 
Dr Merkozy-Bangg...
(Melodie vo EAV - Der Wein von Mykonos)
 
D’Merggel und dr Nicolas,
schyyne e biz e Gryyse z’ha,
sie gehn uf d’Akropolis,
är in schwarz und sie in wiss
und d’Carla Bruni macht e Gschiss!

Dr Sarkozy isch nit so gross,
drum nimmt en d’Merggel uf e Schoss
sie huucht ihm zärtlig in sys Ohr:
„Du, ich glaub im Fall, s’isch wohr,
unsre Eyro isch in Gfohr!

Druf flyschteret dr Nicolas:
„Du ich glaub, do’sch ebbis dra,
zerscht dä Saich in Griecheland,
denn no d’Spanier im Sand,
und au no d’Kelbe an dr Wand!“

„Wie wänn mir dr Eyro rette?“
Frogt denn dr Nicolas bym Bette,
wo sich d’Angie denn entbleest,
dr glai Sarggo het scho deest,
het sich die Gryyse au nit gleest!

Rettigsschirm und Rettigsfond,
und denn au no Eyrobond,
d’Angie sait am Zmorgetisch,
by Croissant gfyllt mit Fisch,
dass das nonig d’Leesig isch!

„Du, sag, Nico, wär macht’s rächt?
Oder zumindescht nit so schlächt?“
„Du, s’liggt doch uf em Tisch,
s’isch drotz kulturellem Gmisch,
s’Land, wo glaub Basel Hauptstadt isch!“

Und d’Moral vo dere Gschicht:
Unsri Nochbere syn nit dicht,
doch ihr miend jetzt aifach gseh,
uns interessiert ganz klar vyl me:
D’Maischterfyyr vom FCB!
© Fäldschnäggli `12

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! und dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!