Schnitzelbängg 2019 (20 Joohr Schni-Schna-Schnitzelbängg)


Jä, gopferdelli, haiaiai und nundefahne,
wirft ufe Kalulu e Zircher e Banane,
speter denn bim Interview sait dä armi Dropf: -
«Moi, j’aime pas les bananes, je préfère Morekopf!»
plus 50% Jubiläumszueschlag:
Dr Aldo Kalulu, s’macht ys gueti Luune -
spielt schins bi dr Negro-Rhygass jetzt Posuune…
© Fäldschnäggli '19

Jä, ych bi dr Schambbe, e Basler Bolizischt,
unsri alte Auti sin doch dr greschti Mischt,
doch au mitem Tesla ha’se nit verwitscht, die Beese -
hani doch bigoscht vergässe, s’Ladekabel z’leese…
plus 50% Jubiläumszueschlag:
Und dr Sprochfähler han y – das muess y jetzt no saage -
letschti het’s mer d’Fliigeldiire voll in d’Frässi gschlaage…
© Fäldschnäggli '19

Jä, bis z’letscht, hundert und zwai Joor,
di letschti MUBA isch verbi - druurig aber wohr,
sy hän halt erkennt, dass es s’nimmi bringt -
mir froge-n-ys worum das em Wessels nit au glingt…
plus 50% Jubiläumszueschlag:
Mir sage’s jo nit gärn, doch s’isch e ächti Gfoohr -
Wenn’s dumm lauft, macht dr Hampe au me als 100 Joor…
© Fäldschnäggli '19

Jä, die Taggtigg vo de Griene im Grossrotssaal,
me nimmt mit e Buschi und paggt d’Bruscht us, da’sch zentral,
s’wird gstillt und s’Resultat isch, isch das nit verruggt -
as d’ Hälfti vo dr SVP nit s’rächte Gnepfli druggt…
plus 50% Jubiläumszueschlag:
Schiins gän sy de Buschi immer nur di Linggi -
will e linggs Buschi us dr Rächte schlächter dringgi…!
© Fäldschnäggli '19

Da’sch dumm, dumm, dumm, dumm, dumm...
(Melodie vom Mormonesong us "South Park")
Jä, Ressli wo uf d'Schnuure gheie - dumm, dumm, dumm, dumm, dumm
Stinggkäfer nit nur im Freie - dumm, dumm, dumm, dumm, dumm
Dr Thorsten Fink isch abgsetzt worde - dumm, dumm, dumm, dumm, dumm
Dr Kübelbögg duet yberborde - dumm, dumm, dumm, dumm, dumm
In Männerclique Quotefraue - dumm, dumm, dumm, dumm, dumm
Dr Trump, dä will sy Myyrli baue - dumm, dumm, dumm, dumm, dumm
Dobbeladler-Geschte mache - dumm, dumm, dumm, dumm, dumm
..........................- dumm, dumm, dumm, dumm, dumm
Drämmli-Dobbel-Halte-Stelle - dumm, dumm, dumm, dumm, dumm
Am Haafe brenne alti Schwelle - dumm, dumm, dumm, dumm, dumm
Dr Juncker, dä isch immer voll - da’sch dumm, dumm, dumm, dumm, dumm
Und uns git’s 20 Joor - da’sch toll, jä-woll, jä-woll, jä-woll!!!
© Fäldschnäggli '19

Jä, fir kulturell Interessierti, isch es intressant,
s’Stadttheater Basel het e neye Intendant,
als erschti Aggtion, so het me n’ys das brichtet -
wurdi schins dr Neymar als Schauspieler verpflichtet…
plus 50% Jubiläumszueschlag:
Als Schauspieler sig är halt e _Siebe-Siech -
will är bekanntlig die beschte Rolle miech…
© Fäldschnäggli '19

Jä, Blastigg gheert ewäg, Blastigg gheert verbotte,
will mir kinftig besser ohni Blastigg läbe sotte,
und d’ Konsequänz, die wär - mir dien nit ybertriibe -
ohni Blastigg wurd vo dr Adela nimm vil ybrig bliibe…
plus 50% Jubiläumszueschlag:
Doch am Liebschte kaufe mir mit dr Adela zämme y -
sälli het jo immer scho zwai Blastiggsegg drby…
© Fäldschnäggli '19

Numme in Oberwil gsunge:
Jä, isch sie nit e wohri Bracht? Mir sin immerno ganz baff!
Zer Wiehnachtszyt isch Oberwil mit Abstand s’schönschte Kaff,
mir hätte no e Freud – gän abr zue, es isch absurd -
wenn im Gmaindroot au mol Aine so schön lüüchte wurd…
plus 50% Jubiläumszueschlag:
Und sott’s mol Aim im Gmainroot zun’re Erlüchtig länge -
chönnt me dä zer Wiehnachtszyt an Kandelaber hänge…
© Fäldschnäggli '19

Jä, mir sin rächti Männer - quasi Potänz pur,
will unsri Männligkait isch toxischer Natur,
mir ässe numme Flaisch, dien-ys zem Pryygle zämmerotte -
es sig denn unsri Fraue finde, dass mir das nit sotte…
plus 50% Jubiläumszueschlag:
Doch letschti hämmer ufe Tisch klopft, kenne mir Eych brichte
bevor mir wieder brav sin go d’Huusarbet verrichte…
und grad nomol plus 50% Jubiläumszueschlag:
Und dass mir jetzt do singe, liggt au numme dinn -
will unsri Fraue in dr Wellness-Wuche sin…
© Fäldschnäggli '19

Y bi dr Streller
(Melodie vom Mike Krüger - Denn ich bin Bundeswehrsoldat)

Jä, bym FC Basel, do lauft’s nimme rund,
dr Wurm isch dinn und das nit ohni Grund,
e neye Sportchef, neye Breesi und e neys Konzäbbt -
wo das anefiehrt, händ ihr erläbbt…

Refrain:
Y bi dr Streller und y waiss doch, wie das lauft,
drum hani au dr Oberlin grad kauft,
Y bi dr Streller, do z’Basel legendär,
e sone Sportchefjebbli isch doch nit so schwär…

D’Vorberaitig schwach, dr Uftaggt ziemlig mau,
e neye Trainer wär vilicht no schlau,
drum kiggi grad dr Wicky und d’Assischtänte schiggi -
aifach dass’s nit haisst, dass’s an mir liggi…

Refrain:
Y bi dr Streller und bi halt e schlaui Nuss,
wenn aine z’vil verliert, denn isch är duss,
Y bi dr Streller und bevor y dureghei,
nimmi fyr zwai Mätsch no dr Alex Frei…

Aine mit Erfahrig, jä, das hani welle,
nimme sone Jungspund ahne stelle,
doch ich ghei us allne Wolgge, bim erschte Interview -
sait dä: «Ich bi de Koller, wer bisch Du…?»

Refrain:
Y bi dr Streller, vilicht hesch’s kenne lääse,
y bi dr Chef und du bisch nur dr Määäääse,
Y bi dr Streller, mir dien d’Ärmel ummelitze,
will die Patrone, jä, die muess jetzt sitze…

Mir bruche kaini Neue, mir hän do kai Drugg,
will es kemme 6 Verletzti zrugg,
so schlimm isch’s jo nit, het’s mi letschti dunggt -
es sin jo numme Ainezwanzig Punggt

Refrain:
Y bi dr Streller und ich ha e grossi Ahnig,
drum verfalli jetzt au nit in Paanig,
Y bi dr Streller, und Ihr wärdet’s gseh,
scho bald simmer wieder vor YB…

Y bi dr Marco Streller und bi grad bitz im Dief,
ha s’ Gfühl das wasi mach, das machi schief,
Wär könnt mir denn hälfe zem erfolgriich z’si? -
Doch halt – do fallt mir öbber i…

Refrain:
Y bi dr Streller und bruch jetzt all mi Muet,
will d’ Fäldschnäggli sin 20 Johr scho guet,
Y bi dr Streller und bi in grosser Not -
drum frogi jetzt dä Bangg do nach sim Rot…!!!

...und do sin unseri Tips an Marco Streller....
(Melodie vo "Mein kleiner grüner Kaktus")

Jä, dr Kalulu Aldo
losch lieber nit an Ball do
Hollari, hollari, hollarooo
Mm-bah, mm-bah, mm-bah, mm-bah,

Dr Ricky sott nit miesse
e Penalty schiesse
Hollari, hollari, hollarooo
Mm-bah, mm-bah, mm-bah, mm-bah (2x),

Uf dr Raoul Petretta
nimmsch lieber gar kei Wett a
Hollari, hollari, hollarooo
Mm-bah, mm-bah, mm-bah, mm-bah,

Dr Ajeti kasch ys bringe
villicht ka dä jo singe
Hollari, hollari, hollarooo
Mm-bah, mm-bah, mm-bah, mm-bah,

Refrain:
Jä, liebe Streller Bippi
bald stohsch au uf dr Kippi
Als Näggschts kunnt als Ersatz villicht dr Scotti Chippi...?

Und dr Burgner Bärni
Schiggsch lieber wyt in d’Färni
Hollari, hollari, hollarooo
Mm-bah, mm-bah, mm-bah, mm-bah,

Bim Oberlin hesch’s gschnallt
dass dä uns nit gfallt
Hollari, hollari, hollarooo
Mm-bah, mm-bah, mm-bah, mm-bah,

Dr Widmer macht ys grangg
drumm losch dä uf dr Bangg
Hollari, hollari, hollarooo
Mm-bah, mm-bah, mm-bah, mm-bah,

Und statt em Balanta
bringsch lieber dini Danta
Hollari, hollari, hollarooo
Mm-bah, mm-bah, mm-bah, mm-bah,

Refrain:
Jä, Marco los mol do
Jetzt mues denn öbbis go
Sunscht wird di Job no vom’ne Inder yberno…

Uf dr Bua sottsch nid setze
will dä wird sich verletze
Hollari, hollari, hollarooo
Mm-bah, mm-bah, mm-bah, mm-bah

Dr Stocker Valentin
dä brucht meh Protein
Hollari, hollari, hollarooo
Mm-bah, mm-bah, mm-bah, mm-bah,

Und dr Luca Zuffi
ladsch besser nimm ins Puff i
Hollari, hollari, hollarooo
Mm-bah, mm-bah, mm-bah, mm-bah,

Und dr Riveros Blas
stellsch sicher nid uf’s Gras
Hollari, hollari, hollarooo
Mm-bah, mm-bah, mm-bah, mm-bah,

Refrain:
Froog doch dr Gegge Heitz
Du findsch en in dr Beiz
E guete Rot vom Gegge Heitz – jä das vertreits…

Dr Zambrano s’isch brutal
lohsch besser im Spital
Hollari, hollari, hollarooo
Mm-bah, mm-bah, mm-bah, mm-bah,

Anstatt em Tauli Xhaka
bringsch lieber e Alpaka
Hollari, hollari, hollarooo
Mm-bah, mm-bah, mm-bah, mm-bah,

Em Noah Okafor
hausch mol ains ans Ohr
Hollari, hollari, hollarooo
Mm-bah, mm-bah, mm-bah, mm-bah,

Dr Serey Die – ‘ey Alte
dä hättsch sotte bhalte
Hollari, hollari, hollarooo
Mm-bah, mm-bah, mm-bah, mm-bah,

Sag «jo» zu unsrem Rot
Denn isch es nonig z’schpot
Will so dr Kibel bald scho wider z’Basel stoht
Schalallallallallalla-Schallallallallalla...Hollari, hollari, hollarooo...
© Fäldschnäggli '19

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!